Verkfræðingafélag Íslands er fagfélag sem m.a. stendur vörð um lögverndað starfsheiti og gæði verkfræðinámsins og vinnum að hagsmunum verkfræðinga á breiðum grundvelli til framtíðar. Stéttarfélag verkfræðinga er kjarafélag sem er málsvari verkfræðinga í kjaramálum. Saman vinna félögin að hagsmunagæslu fyrir alla verkfræðinga.  Lesa meira

Verkfræðimenntun er mjög krefjandi undirbúningur fyrir ævistarf. VFÍ samþykkir menntun og réttindi verkfræðinga og stendur vörð um þau. Samkvæmt lögum hafa þeir menn einir rétt til að kalla sig verkfræðing, sem fengið hafa til þess leyfi ráðherra, enda hafi þeir lokið námi frá fullgildum verkfræðiskóla. Menntamálanefnd VFÍ er umsagnaraðili um starfsheitisumsókn. Í samvinnu við Iðnaðarráðuneytið hefur VFÍ sett fram þær menntunarkröfur sem þarf til að öðlast starfsheitið verkfræðingur.

Við styrkjum stöðu fagsins og einstaklinga innan þess með því að efla þekkingu og tryggja faglega umfjöllun. VFÍ er stofnaðili að Endurmenntunarstofnun Háskóla Íslands og tryggir framboð fyrir símenntun með þátttöku í stjórnun hennar. Vaxandi samkeppni milli faghópa um forystu á sviði vísinda, stjórnunar, athafna og viðskipta undirstrikar nauðsyn þes að efla þekkingu og samstöðu verkfræðinga.

Góð ímynd er mikilvægur bakhjarl í samfélagi nútímans. Ímynd verkfræðinga varðar hvern og einn okkar og hún kemur ekki af sjálfu sér. Hana þarf að byggja upp markvisst og með samvirkum hætti. Ef við tökum ekki frumkvæðið, eigum við á hættu að orðstír verkfræðinga verði mótaður af öðrum sem síður skyldi.