Félagslög VFÍ

Samþykkt á aðalfundi 11. mars 1998 og síðar í allsherjaratkvæðagreiðslu sem lauk 31. ágúst 1998. Á aðalfundi 29. mars 2000 var 10. gr. breytt vegna félagsaðildar og í 30. gr. voru félagsgjöld lækkuð á þeim yngstu. Á aðalfundi 28. mars 2001 og aðalfundi 30. mars 2005 urðu breytingar á 30. gr. og 31. gr.

Nafn

1. grein

Félagið heitir Verkfræðingafélag Íslands, skammstafað VFÍ, og hefur aðsetur í Reykjavík. Um málefni Verkfræðingafélags Íslands fjalla stjórn og fulltrúaráð, sbr.12. og 13. grein, auk félagsfunda.

MARKMIÐ FÉLAGSINS

2. grein

Markmið félagsins er:
að efla verkfræðilega og vísindalega þekkingu félagsmanna,
að auka gagnkvæm kynni þeirra,
að stuðla að tækniþróun í landinu,
að auka álit verkfræðilegrar og vísindalegrar menntunar,
að auka þekkingu og skilning á starfi verkfræðinga,
að gæta hagsmuna stéttarinnar í hvívetna.

3. grein

Félagið vinnur að markmiðum sínum meðal annars með því:
að halda fundi um áhugamál félagsmanna,
að halda uppi fræðslustarfsemi, svo sem námskeiðum og erindaflutningi,
að stuðla að endurmenntun verkfræðinga,
að efna til skoðunarferða,
að gefa út Árbók VFÍ og stunda aðra útgáfustarfsemi,
að stuðla að starfsemi sérgreina- og landshlutadeilda, sem fjalla um málefni hinna ýmsu verkfræðigreina,
að stuðla að starfsemi hagsmunafélaga, er gæta hagsmuna stéttarinnar,
að hafa tengsl við samtök verkfræðinga erlendis,
að hafa tengsl við samtök háskólamenntaðra manna hérlendis og erlendis.

FÉLAGAR

4. grein

Almennir félagar geta orðið:
1. Þeir, sem lokið hafa viðurkenndri prófgráðu í verkfræði, svo og þeir, sem lokið hafa viðurkenndri háskólaprófgráðu í þeim vísindagreinum, sem verkfræðin byggist á (eðlisfræði, efnafræði, stærðfræði o.fl.).
2. Aðrir fræðimenn í raunvísindum eða framkvæmdamenn á tæknisviði, sem stjórn félagsins býður að gerast félagar, þegar ástæður mæla með.

Sjá 8. grein og 19.grein.

5. grein

Verkfræðinemar, sem lokið hafa tveimur námsárum af háskólanámi í verkfræði eða vísindagrein, sem verkfræðin byggist á, geta orðið félagar með takmörkuðum réttindum og skyldum skv. 9. og 10.gr. meðan þeir stunda námið. Nefnast þeir ungfélagar.
Verkfræðinemar, sem óska eftir inntöku skulu senda stjórn skriflega umsókn. Stjórnin tekur endanlega afstöðu til slíkra umsókna.

6. grein

Stjórn félagsins getur boðið fræðimönnum í raunvísindum og framkvæmdamönnum að gerast félagar, enda mæli sérstakar ástæður með því. Nefnast þeir kjörfélagar.Til kjörs kjörfélaga þarf samhljóða atkvæði allra stjórnarmanna.

7. grein

Stjórn félagsins getur kjörið sem heiðursfélaga menn, sem leyst hafa af hendi mikilsverð störf á sviði verkfræði eða vísinda.
Til kjörs heiðursfélaga þarf samhljóða atkvæði allra stjórnarmanna. Stjórn félagsins getur veitt heiðursmerki í viðurkenningarskyni fyrir vel unnin störf á sviði verkfræði eða í þágu félagsins.

8. grein

Þeir, sem óska að gerast félagar skv. 1. lið 4.gr., skulu senda stjórn félagsins umsóknir um inngöngu á eyðublöðum, sem stjórnin gefur út. Framkvæmdastjóri félagsins sendir Menntamálanefnd VFÍ til umsagnar allar umsóknir um inngöngu í félagið og/eða verkfræðingstitilinn. Menntamálanefnd fer eftir þeim reglum sem stjórnin hefur samþykkt um meðferð umsókna (inntökureglur), þar sem m.a. skal kveðið á um lágmarkskröfur sem gera skal til menntunar nýrra félagsmanna. Ef umsögn menntamálanefndar er jákvæð ber stjórninni að veita umsækjanda aðild að félaginu. Ef umsögn er neikvæð getur stjórnin ekki veitt viðkomandi aðild að félaginu, nema í algjörum undantekningartilvikum, t.d. ef viðkomandi getur ekki aflað tilskilinna gagna vegna styrjalda eða af stjórnmálalegum ástæðum. Í slíkum tilfellum þarf stjórnin að samþykkja inngöngu samhljóða.

RÉTTINDI OG SKYLDUR FÉLAGA

9. grein

Félagsmönnum er skylt að fara eftir lögum félagsins, siðareglum og öðrum samþykktum þess. Sérhver almennur félagi er skyldur til að verða við kosningu til starfa í félaginu, nema gild forföll hamli, en getur neitað endurkjöri jafnlangan tíma og hann hefur gegnt störfum.

10. grein

Almennir félagar hafa rétt til að kenna sig við félagið og nota skammstöfunina FVFÍ með nafni sínu. Almennir félagar, kjörfélagar og heiðursfélagar hafa rétt til að vera félagar í einni eða fleiri deildum, með þeim takmörkunum, sem lög þeirra segja til um. Ungfélögum er heimil fundarseta á almennum fundum og á fundum í deildum. Þeir hafa ekki önnur réttindi í félaginu. Atkvæðisrétt hafa félagar, sem tilgreindir eru í 4.gr., 6.gr. og 7.gr. Þeir félagsmenn einir eiga seturétt í stjórn og/eða Menntamálanefnd VFÍ sem rétt hafa til að kalla sig verkfræðinga.

SKIPULAG OG STJÓRN FÉLAGSINS

11. grein

Æðsta vald í málefnum félagsins hefur aðalfundur. Starfsemi félagsins er stjórnað af stjórn undir forystu formanns. Framkvæmdastjóri og starfslið skrifstofu félagsins annast dagleg störf að málefnum þess. Innan vébanda félagsins starfar fulltrúaráð skv. 13.gr. Innan vébanda félagsins starfa deildir og hagsmunafélög skv. 14.gr. Fastanefndir starfa innan félagsins að sérstökum málefnum. Félagið getur gerst aðili að öðrum samtökum.

12 . grein

Stjórn skipa formaður, og þeir fjórir meðstjórnendur, sem kosnir eru beinni kosningu á aðalfundi. Stjórnin kýs sér varaformann úr röðum meðstjórnenda til eins árs í senn. Stjórnin setur sér starfsreglur, ræður framkvæmdastjóra, sem ræður annað starfsfólk í samráði við stjórnina. Stjórnin skal leggja fram á aðalfundi skýrslu um starfsemi félagsins fyrir liðið starfsár, endurskoðaða reikninga, ennfremur starfsáætlun næsta starfsárs og fjárhagsáætlun. Stjórnin getur veitt framkvæmdastjóra prókúruumboð fyrir félagið. Stjórnin skal halda gerðarbók um fundi sína og ákvarðanir.

13. grein

Fulltrúaráð er stjórn félagsins til ráðuneytis og stuðlar að samræmingu og upplýsingamiðlun innan þess.
Í fulltrúaráði situr stjórn félagsins, svo og formenn deilda, fastanefnda og hagsmunafélaga, sem samþykki hafa hlotið, sbr. 14. gr. Formaður og varaformaður stjórnar hafa sömu embætti í fulltrúaráði. Formaður kallar fulltrúaráð saman til funda og getur boðað varamenn á fundi, þegar þess er talin þörf. Fulltrúaráð skal koma saman að minnsta kosti tvisvar sinnum á tímabilinu 15. sept.til 15. maí. Fulltrúaráð skal halda gerðarbók um fundi sína og ákvarðanir.

DEILDIR OG HAGSMUNAFÉLÖG

14. grein

Innan vébanda VFÍ geta starfað sérgreinadeildir, landshlutadeildir, klúbbdeildir og hagsmunafélög. Sérgreinadeildir félagsmanna fjalla um málefni hinna ýmsu verkfræðigreina. Landshlutadeildir eru samtök félagsmanna, búsettra í hinum ýmsu landshlutum (héruðum). Klúbbdeildir félagsmanna starfa að ýmsum áhugamálum félagsmanna. Hagsmunafélög gæta hagsmuna félagsmanna sinna og geta í því sambandi, að fengnu samþykki stjórnar VFÍ, átt aðild að öðrum samtökum. Lög sérgreinadeilda, landshlutadeilda og klúbbdeilda og breytingar á þeim skulu hljóta samþykki aðalfundar VFÍ á sama hátt og lög VFÍ. Hagsmunafélag, sem óskar að starfa innan vébanda VFÍ, skal senda um það umsókn til stjórnar VFÍ. Stjórninni er skylt að leggja slíka umsókn fyrir aðalfund og geta hennar í fundarboði. Til samþykktar á slíkri aðild þarf einfaldan meirihluta atkvæða á aðalfundi. Deildir mega ekki koma fram opinberlega í nafni VFÍ nema með samþykki stjórnar. Hagsmunafélög skulu hafa sjálfstæðan fjárhag og koma fram opinberlega í eigin nafni. Deildir mega hafa sjálfstæðan fjárhag.

15. grein

Félag áhugamanna eða sérfræðinga um verkfræði, tækni eða önnur skyld mál getur óskað eftir að tengjast VFÍ, án þess að vera sérgreinadeild, landshlutadeild, klúbbdeild eða hagsmunafélag í merkingu 14. gr. Það er ekki skilyrði fyrir tengslum eða samvinnu við VFÍ, að í félagi, sem hlut á að máli, séu eingöngu verkfræðingar. Gera skal hverju sinni sérstakan samning um tengsl eða samvinnu félags við VFÍ. Samningur skal gerður á þeim grundvelli, að aðilar hans séu hvor um sig sjálfstætt félag varðandi fjárhag og önnur atriði. Samningur samkvæmt þessari grein er ekki bindandi fyrir VFÍ án samþykkis aðalfundar. Sama á við um breytingar á slíkum samningi.

HÚSSJÓÐUR OG VERKFRÆÐINGAHÚS

16. grein

Markmið hússjóðs Verkfræðingafélags Íslands er að reka húseign félagsins að Engjateigi 7-9 í Reykjavík, sem heitir Verkfræðingahús. Hússjóður skal hafa aðskilinn fjárhag og sérstakt reikningshald. Stjórn VFÍ skipar húsnefnd, sem annast rekstur hússjóðs. Fyrir lok hvers starfsárs skal húsnefnd leggja fram reikninga og skýrslu um starfsemi og afkomu hússjóðs ásamt áætlunum um framkvæmdir og fjárþörf sjóðsins fyrir næsta starfsár.

FASTANEFNDIR

17. grein

Fastanefndir eru skipaðar af stjórn VFÍ til eins árs í senn og skal leitast við, að þær endurspegli vilja og hugmyndir deilda og hagsmunafélaga félagsins. Fastanefndir skulu standa stjórn skil á starfsemi sinni. Fyrir lok hvers starfsárs skulu fastanefndir gefa stjórn skýrslu um starfsemi ásamt áætlunum um verkefni og fjárþörf nefndanna fyrir næsta starfsár. Stjórn getur heimilað fastanefndum að starfa með sambærilegum nefndum annarra félaga.

18. grein

Siðanefnd skal starfa í félaginu. Hlutverk hennar er að láta í ljós álit um ágreining, sem rísa kann vegna ætlaðs brots á siðareglum félagsins. Nefndin kemur saman, ef tilefni er til. Siðanefnd starfar óháð stjórn VFÍ og ákveður hvernig áliti nefndarinnar er komið á framfæri. Í siðanefnd eiga sæti fimm fyrrverandi formenn félagsins, þeir er síðast gegndu því starfi. Fráfarandi formaður skal þó ekki sitja í nefndinni fyrr en að tveimur árum liðnum frá því að hann lét af formennsku. Sé einhver nefndarmaður forfallaður, tekur sá sæti í nefndinni, sem gegndi starfi næst á undan þeim fimm o.s.frv.. Formaður siðanefndar er sá, sem fyrstur nefndarmanna gegndi formennsku í félaginu. Formaður kallar nefndina saman og stýrir fundum hennar.

19. grein

Menntamálanefnd skal standa vörð um menntun verkfræðinga og fylgjast með verkfræðinámi sem í boði er hér á landi. Menntamálanefnd skal vera stjórn félagsins til ráðuneytis um menntamál. Menntamálanefnd skal hafa frumkvæði að því, hvernig VFÍ getur beitt áhrifum sínum gagnvart yfirvöldum menntamála í því skyni að ná markmiðum félagsins. Menntamálanefnd skal semja reglur um þær menntunarkröfur, sem krafist er til inngöngu í félagið. Þessar reglur skulu hljóta samþykki stjórnar og skulu síðan gefnar út. Nefndin skal í samvinnu við Endur- og símenntunarnefnd VFÍ semja markmið og kröfur varðandi endurmenntun félagsmanna.

20. grein

Endur- og símenntunarnefnd VFÍ vinnur að því að efla þekkingu félagsmanna og gefa þeim kost á að halda þekkingu sinni við þannig að hún sé ætíð í samræmi við nýjustu tækni. Nefndin skal fara með endurmenntunar- og símenntunarmál fyrir hönd félagsins. Nefndin skipuleggur endurmenntunarnámskeið fyrir félagsmenn og annað sem nýtist félagsmönnum til endurmenntunar. Nefndin setur reglur um kröfur sem gerðar eru til endurmenntunar þannig að félagið geti veitt félagsmönnum viðurkenningu þegar þeir hafa náð ákveðnum árangri. Nefndin skal hafa samráð við Endurmenntunarstofnun Háskóla Íslands og menntamálanefnd VFÍ, sbr. 19. grein.

21. grein

Kynningarnefnd skal vinna að auknu áliti verkfræðilegrar og vísindalegrar menntunar í landinu og auka skilning á starfi verkfræðinga. Nefndin skal vinna reglulega að kynningu á málefnum félagsins gagnvart almenningi, stjórnvöldum og fjölmiðlum í samráði við stjórnir félagsins. Nefndin vinnur að hlutverki sínu með því að efna til funda og ráðstefna eða með hverjum þeim hætti, sem viðeigandi er hverju sinni.

22. grein

Minjanefnd skal vinna að vörslu sögulegra minja er tengjast starfi verkfræðinga og framfarasögu þjóðarinnar. Nefndin skal hafa umsjón með myndasafni og sögusafni félagsins og stuðla að varðveislu tækniminja meðal annars í samvinnu við Þjóðminjasafn Íslands.

23. grein

Útgáfunefnd skal annast útgáfu Árbókar VFÍ og standa að útgáfu fréttablaðs félagsins. Báðum ritum skal dreift til allra félagsmanna. Árbók skal vera vettvangur faglegrar umræðu og heimild um starfsemi félagsins. Hún skal koma út árlega. Fréttablað skal gefið út eigi sjaldnar en 10 sinnum á ári. Fréttablaðið skal standa öllum deildum félagsins opið til upplýsingadreifingar.

AÐALFUNDUR

24. grein

Aðalfundur skal haldinn í marsmánuði ár hvert.
Aðalfundi og aukaaðalfundi skal boða bréflega til allra félagsmanna með minnst 14 daga fyrirvara.
Dagskrá fundarins skal tilkynnt í fundarboði, svo og allar tillögur, sem þurfa samþykki aðalfundar samkvæmt félagslögum.
Í fundarboði skal einnig tilkynna um allar tillögur um nýjar framkvæmdir eða fjárskuldbindingar, sem nema 30% eða meira af árlegum félagsgjöldum. Slíkar tillögur frá félagsmönnum skulu hafa borist stjórninni fyrir 15. febrúar. Verði á aðalfundi verulegar efnisbreytingar á áður kynntum tillögum skal afgreiðslu þeirra frestað og boðað til aukaaðalfundar eða alsherjaratkvæðagreislu. Aðalfundur og aukaaðalfundir eru lögmætir séu þeir boðaðir samkvæmt ofanskráðu.
Skýrslur stjórnar og fastanefnda skulu liggja frammi á aðalfundi.

Á dagskrá fundarins skal vera:
Skýrslur um störf félagsins á liðnu starfsári.
Reikningsskil.
Tillögur og lagabreytingar.
Fjárhagsáætlun og ákvörðun félagsgjalda.
Kjör skv. félagslögum og kjör endurskoðenda.
Önnur mál.

25. grein

Formann, fjóra meðstjórnendur og tvo varameðstjórnendur skal kjósa skriflega til tveggja ára í senn þannig að annað árið skal kjósa formann, tvo meðstjórnendur og einn varameðstjórnanda, en hitt árið tvo meðstjórnendur og einn varameðstjórnanda. Endurkjör er heimilt einu sinni, þannig að formaður og/eða meðstjórnendur geta setið fjögur ár samfellt í stjórn. Stjórn tilkynnir félagsmönnum eigi síðar en 1. febrúar, hverjir stjórnarmanna ganga úr stjórninni á næsta aðalfundi, og auglýsir eftir tillögum félagsmanna um stjórnarmenn. Þær tillögur skulu vera skriflegar og hafa borist stjórninni fyrir 15. febrúar. Að þeim fresti útrunnum, skal kynna formannsefni / formannsefnum uppástungur, sem borist hafa. Eigi síðar en með aðalfundarboði sendir stjórnin félagsmönnum kjörseðla með nöfnum allra þeirra, sem stungið hefur verið upp á. Stungið skal upp á a.m.k. þremur meðstjórnendaefnum, og verða þeir meðstjórnendur, er flest atkvæði hljóta og varameðstjórnandi sá, er næstur kemur í röðinni.

26. grein

Aukaaðalfund skal kalla saman, þegar stjórninni þykir ástæða til eða þegar 50 félagar óska þess skriflega.

ALMENNIR FÉLAGSFUNDIR

27. grein

Aðra fundi en aðalfundi, svo sem almenna félagsfundi skal boða þegar og á hvern þann hátt, sem stjórn ákveður. Stjórnin ákveður fundarefni og fundartíma. Stefnt skal að því, að félagsfundir séu á tímabilinu 15.sept. til 15.maí. Fundarefni skulu valin í samræmi við markmið félagsins og áhugamál félagsmanna. Stjórn getur boðið gestum á félagsfundi. Hver félagsmaður getur með leyfi formanns eða framkvæmdastjóra boðið gestum á félagsfundi. Stjórn getur og ákveðið, að einstakir fundir séu opnir almenningi og auglýst þá samkvæmt því. Félagsmaður, sem flytur erindi eða skýrslu á fundi í VFÍ, skal láta í té ritaðan útdrátt af því, sem hann flytur, ef þess er óskað. Umræður á fundum skulu skráðar af fundarritara í fundargerðarbók. Stjórn getur með samþykki höfunda eða frummælenda látið birta í Árbók (fréttablaði) VFÍ eða á annan hátt erindi og skýrslur, sem fluttar eru á fundum, eða útdrátt úr þeim og útdrátt úr umræðum.

ALLSHERJARATKVÆÐAGREIÐSLA

28. grein

Stjórn félagsins getur látið fara fram allsherjaratkvæðagreiðslu, þegar henni þykir ástæða til eða 50 félagar óska þess skriflega. Með allsherjaratkvæðagreiðslu má taka ákvörðun um öll þau mál, sem aðalfundir einir geta annars tekið ákvörðun um. Til samþykktar tillögu við slíka atkvæðagreiðslu þarf meira en helming greiddra atkvæða. Sjá þó 38. grein. Allsherjaratkvæðagreiðsla fer fram skriflega. Öllum félagsmönnum skal senda kjörgögn og þær tillögur, er greiða skal atkvæði um, og tilkynna skilafrest á atkvæðaseðlum. Frestur þessi skal ekki vera skemmri en 3 vikur. Atkvæðaseðlar skulu sendir í pósthólf félagsins, og skal pósthólfsnúmerið fylgja kjörgögnum. Þegar skilafrestur er útrunninn, skal stjórnin láta telja atkvæðin. Stjórn félagsins skal birta úrslit allsherjaratkvæðagreiðslu í fréttablaði VFÍ eða senda öllum félagsmönnum skriflega tilkynningu um úrslitin.

FÉLAGSGJÖLD

29. grein

Aðalfundur VFÍ ákveður almennt félagsgjald og gjöld til fastanefnda að fengnum tillögum stjórnar. Gjalddagi gjalda er 1. apríl ár hvert. Greiði félagsmenn gjöld sín síðar, er stjórn heimilt að láta þá bera innheimtu-kostnað og dráttarvexti. Skuldi félagsmaður árgjöld tveggja ára, skal stjórn fella nafn hans af félagaskrá að undan-genginni skriflegri viðvörun. Félagsmaður öðlast félagsréttindi sín á ný, þegar árgjaldaskuldin er að fullu greidd.

30. grein

Félagsmenn búsettir utan Reykjavíkur og nágrennis skulu greiða tvo þriðju hluta af fullu félagsgjaldi nema þar sem er starfandi landshlutadeild, þá greiða félagsmenn 4/5 hluta af fullu félagsgjaldi. Félagar búsettir erlendis skulu greiða helming af fullu félagsgjaldi. Ungfélagar og félagar sem eru í fullu námi skulu ekki greiða félagsgjald.

Nýr félagsmaður skal greiða félagsgjald sem hér segir sé hann búsettur á höfuðborgarsvæðinu:

Prófár 1/10 af fullu félagsgjaldi
Prófár + eitt ár 1/4 af fullu félagsgjaldi
Prófár + tvö ár 1/4 af fullu félagsgjaldi
Prófár + þrjú ár 1/2 af fullu félagsgjaldi
Prófár + fjögur ár 1/2 af fullu félagsgjaldi
Prófár + fimm ár fullt félagsgjald

Þeir félagsmenn sem samkvæmt 9. gr. félagslaga VFÍ eiga ekki rétt til setu í stjórn og/eða Menntamálanefnd VFÍ greiða eigi hærra en 1/2 félagsgjald.

Nýir félagsmenn búsettir utan Reykjavíkur og nágrennis skulu greiða tvo þriðju hluta félagsgjaldsins sbr. töfluna hér að ofan nema þar sem er starfandi landshlutadeild, þá greiða félagsmenn 4/5 hluta af félagsgjaldinu hér að ofan, þó aldrei lægra en 1/10 af fullu félagsgjaldi.

Félagsmenn eldri en 70 ára greiði einn tíunda af fullu félagsgjaldi. Félagsmenn eldri en 65 ára sem hætt hafa störfum greiði einn tíunda af fullu félagsgjaldi. Heiðursfélagar greiði ekki félagsgjald. Félagsmenn sem eru í skráðri sambúð eða eru hjón greiði hvort þrjá fjórðu hluta þess gjalds sem hvoru bæri að greiða væru þau ekki í hjónabandi/sambúð. Landshlutadeildir fá greitt fjórðung þeirra félagsgjalda sem greidd eru af félögum í viðkomandi landshluta.

31. grein

Stjórn félagsins hefur heimild til að lækka gjöld þeirra félagsmanna sem eru einnig í Stéttarfélagi verkfræðinga um allt að 15%. Stjórn félagsins er heimilt að veita allt að 10% afslátt af félagsgjöldum þeirra félagsmanna sem eru í erlendum verkfræðingafélögum ef gerður hefur verið samningur um gagnkvæman afslátt á milli VFÍ og viðkomandi félags. Stjórn félagsins getur lækkað eða fellt niður félagsgjald yfirstandandi árs hjá félagsmanni ef sérstakar ástæður þykja mæla með því, t.d. ef tekjur félagsmannsins hafa lækkað verulega vegna sjúkleika, atvinnuleysis eða af öðrum ástæðum.

SKRIFSTOFA VFÍ

32. grein

Félagið rekur skrifstofu til þjónustu við félagsmenn. Rekstur skrifstofunnar skal fjármagnaður með hluta af almennum félagsgjöldum annars vegar og hins vegar með þjónustu við fastanefndir félagsins, deildir og hagsmunafélög. Fyrir lok hvers starfsárs skal framkvæmdastjóri afhenda stjórn áætlanir um verkefni og fjárþörf skrifstofunnar fyrir næsta starfsár.

REIKNINGAR OG ENDURSKOÐUN

33. grein

Reikningsár félagsins er almanaksárið. Stjórn félagsins setur á hverjum tíma reglur um bókhald. Reikningar félagsins skulu vera endurskoðaðir af löggiltum endurskoðanda og félagslegum skoðunarmanni. Skulu reikningarnir birtir á aðalfundi.

34. grein

Allir sjóðir félagsins, að undanskildum sjóðum deilda, sem hafa sjálfstæðan fjárhag, skulu vera í vörslu stjórnar, og skal hún sjá um, að þeir séu ávaxtaðir á tryggan hátt. Um sérstaka sjóði félagsins skulu samdar reglur, og skulu þær samþykktar á aðalfundi og fjallað um þær eins og lög félagsins.

GERÐARDÓMUR

35. grein

Félagið tekur að sér að skipa gerðardóm til þess að fella fullnaðarúrskurð um ágreining í tæknilegum málum.
Reglur um skipun og störf slíks gerðardóms skulu hljóta sömu málsmeðferð og lög félagsins.

ÚRSÖGN

36. grein

Úrsögn úr félaginu skal tilkynnt stjórn félagsins skriflega með fjögurra mánaða fyrirvara.

BROTTVIKNING

37. grein

Brjóti félagsmaður lög eða aðrar samþykktir félagsins, eða komi á annan hátt þannig fram, að ekki samræmist markmiði félagsins eða heiðri verkfræðingastéttarinnar, getur stjórn félagsins veitt honum áminningu eða lagt til, að honum verði vikið úr félaginu, enda hafi viðkomandi félagsmanni verið gefinn kostur á að leggja fram skriflega greinargerð máli sínu til varnar. Til að slík tillaga teljist samþykkt, þarf hún að hljóta staðfestingu siðanefndar félagsins samkvæmt 18. grein.

LAGABREYTINGAR

38. grein

Breytingar á lögum þessum má eingöngu gera á aðalfundi eða samkvæmt 28. gr. Tillögur um lagabreytingar, sem leggja á fyrir aðalfund, skulu birtar í fundarboði. Til lagabreytinga sem bornar eru undir aðalfund þarf 2/3 greiddra atkvæða. Sama gildir í allsherjaratkvæðagreiðslu. Ef innan við 10% félagsmanna taka þátt í atkvæðagreiðslu á aðalfundi um grundvallarbreytingu á VFÍ, svo sem sameiningu við önnur félög, reglur um félagsaðild eða mikilvægar ákvarðanir um fjármál VFÍ eða sjóða þess, öðlast slík ályktun ekki gildi, nema hún verði samþykkt með 2/3 greiddra atkvæða á næsta aðalfundi. Eigi má selja eða veðsetja fasteign í eigu félagsins án samþykkis aðalfundar. Um slíkt samþykki skal fara eftir ákvæðum 3. mgr. Einnig getur stjórn félagsins látið fara fram allsherjaratkvæðagreiðslu í samræmi við 28. grein ef að mati hennar er óheppilegt að bíða með að fá lagabreytinguna afgreidda. Lagabreytingar skulu birtar félagsmönnum.

FUNDARSKÖP VFÍ

(Samþykkt 16. mars 1955)

Formaður félagsins stjórnar fundum, en í forföllum hans varaformaður eða einhver annar úr stjórninni. Á aðalfundum skal þó kosinn sérstakur fundarstjóri.
Þegar fundur hefur verið settur, les ritari upp fundargerð síðasta fundar, en fundarstjóri leitar staðfestingar fundarins á henni. Komi leiðréttingar fram, skal geta þeirra í fundargerð yfirstandandi fundar.
Fundarstjóri og ritari undirskrifa gerðabókina.
Fundarstjóri stjórnar umræðum og gætir þess, að fundarmenn ræði það efni, sem þá er til meðferðar.
Fundarstjóri leyfir mönnum að tala í sömu röð og þeir kveðja sér hljóðs. Þyki honum umræður verða óþarflega langar, má hann skammta ræðumönnum tíma.
Fundarmenn geta lagt til, að umræðum sé hætt. Tillögu um það má ekki ræða, en skal lýsa og bera undir atkvæði fundarins, þá er sá hefur lokið máli sínu, sem er að tala, þegar fundarstjóra er afhent tillagan.
Í tillögunni skal taka fram, hvort hætta skuli umræðum strax, eða þegar þeir hafa talað, sem á mælendaskrá eru. Tillagan skal vera skrifleg.
Atkvæðagreiðsla fer fram þannig, að þeir, sem greiða atkvæði, rétta upp hönd, nema þegar skrifleg atkvæðagreiðsla er fyrirskipuð í lögum félagsins eða fimm fundarmenn krefjast hennar.
Afl atkvæða ræður úrslitum, nema öðruvísi sé ákveðið í lögum félagsins. Tillögum í sama máli skal bera undir atkvæði í sömu röð og þær koma fram. Þó skal, ef tillögur ganga mislangt, bera þá tillögu upp fyrst, sem lengst gengur. Breytingatillögu skal bera upp á undan aðaltillögu. Tillögu, sem felld hefur verið, má ekki bera upp aftur á sama fundi.
Sá, sem flest atkvæði fær við nefndarkosningu, fyrstur er tilnefndur, ef atkvæði eru jöfn eða nefnd sjálfkjörin, og fyrstur talinn, þegar nefnd er skipuð, skal kalla nefndina saman á fyrsta fund og stjórna starfsskiptingu í nefndinni.
Það skal vera regla að leiða ekki mikilsvarðandi mál til lykta á þeim fundi, sem þau eru borin fram á, nema þeirra hafi verið getið í fundarboðinu og með svo löngum fyrirvara, að félagsmenn hafi haft tíma til að kynna sér þau.
Þó má afgreiða slík mál á einum fundi, ef 2/3 fundarmanna samþykkja það, enda standi svo á, að afgreiðsla málsins þoli enga bið.

Senda grein