Fréttir
Vel heppnaður vinnufundur
Föstudaginn 5. mars var vinnufundur um siðareglur VFÍ. Var hann með „þjóðfundarformi” og þótti takast afar vel. Þátttakendur voru valdir af handahófi úr félagaskrá VFÍ og skrá Iðnaðarráðuneytis yfir þá sem hafa fengið leyfi til að nota starfsheitið verkfræðingur. Einnig gátu áhugasamir skráð sig til þátttöku. Niðurstöður fundarins verða efniviður nefndar sem mun gera nýjar siðareglur fyrir félagið og er ráðgert að leggja þær fram á aðalfundi 2011 til samþykktar.
Viðskiptasiðfræði
Félag stjórnenda og sjálfstætt starfandi í TFÍ bauð nýverið til hádegisnámskeiðs um viðskiptasiðfræði. Fyrirlesari var Stefán Einar Stefánsson, viðskiptasiðfræðingur við lagadeild Háskólans í Reykjavík. Ríflega 60 manns sóttu námskeiðið sem þótti takast vel og margt fróðlegt kom fram. Hér má nálgast glærur frá námskeiðinu.
Vinnufundur um siðareglur VFÍ
Vinnufundur um siðareglur Verkfræðingafélags Íslands verður föstudaginn 5. mars kl. 13-16. Fundurinn verður með „þjóðfundarformi". Þátttakendur voru valdir af handahófi úr félagaskrá VFÍ og einnig skrá iðnaðarráðuneytis yfir þá einstaklinga sem hafa hlotið leyfi til að nota starfsheitið verkfræðingur. Þeir verkfræðingar sem hafa áhuga á að taka þátt í fundinum, en lentu ekki í úrtakinu, eru eindregið hvattir til að hafa samband við Árna B. Björnsson, framkv.stj. VFÍ.
Félagsfundur um kjaramál
Haldinn var almennur fundur um FRV kjarasamninginn í gær, fimmtudaginn 11. febrúar. Félagsmenn SV og KTFÍ fylktu liði á fundinn og voru fyrirspurnir og umræður um stöðu samningaviðræðna við FRV margar og miklar. Kröfugerð félaganna var síðan rædd og leiddi sú umræða til einróma ályktunar fundarins; að kröfur sem samninganefnd KTFÍ og SV lagði fyrir FRV væru hófsamar. Samninganefndinni var falið að beita sér til hins ýtrasta til að ná þeim fram. Fundarmenn undruðust mjög að kjarasamningar væru enn lausir eftir 1 og ½ árs tímabil.
Félögin á Framadögum 2010
Félög verkfræðinga og tæknifræðinga tóku þátt í Framadögum 2010 sem fóru fram í Háskólabíói 10. febrúar. Á Framadögum geta háskólanemar kynnst starfssemi fyrirtækja og félaga og búið sig undir þátttöku í atvinnulífinu. Fulltrúar félaganna stóðu vaktina og svöruðu margvíslegum spurningum um starfsemi félaganna og vinnumarkað verkfræðinga og tæknifræðinga.
Þrjú sæmd heiðursmerki VFÍ
Á árshátíð Verkfræðingafélags Íslands, sem haldin var 6. febrúar sl., voru þrír einstaklingar sæmdir heiðursmerki félagsins. - Áslaug Haraldsdóttir verkfræðingur, Logi Elfar Kristjánsson verkfræðingur og Páll Theódórsson eðlisfræðingur. Á myndinni eru Jóhanna Harpa Árnadóttir, formaður VFÍ, Logi Kristjánsson, Páll Theódórsson og Árni B. Björnsson, framkvæmdastjóri félagsins. Áslaug Haraldsdóttir er búsett í Bandaríkjunum og var ekki viðstödd afhendinguna. Móttaka henni til heiðurs verður á vormánuðum og fær hún þá heiðursmerkið afhent ásamt viðurkenningarskjali.
Námskeið um viðskiptasiðfræði
Þriðjudaginn 23. febrúar verður haldið hádegisnámskeið um viðskiptasiðfræði. Fyrirlesari er Stefán Einar Stefánsson, viðskiptasiðfræðingur við lagadeild Háskólans í Reykjavík. Námskeiðinu er ætlað að gera þátttakendum betur kleift að vega og meta þau álitamál sem verða á vegi þeirra í viðskiptum og rekstri. Námskeiðið er í boði Félags stjórnenda og sjálfstætt starfandi innan TFÍ (STFÍ) en allir félagsmenn TFÍ, SV og VFÍ eru velkomnir. Vinsamlega skráið ykkur með því að senda póst.
Lesa meira
Staða samninga við FRV
Samninganefndir KTFÍ og SV við Félag ráðgjafarverkfræðinga (FRV) boða til sameiginlegs kynningarfundar fimmtudaginn 11. febrúar kl. 17:15, að Engjateigi 9. Á fundinum verður kynnt staða samninga og rædd túlkun tiltekinna ákvæða kjarasamnings félaganna við FRV.
Fræ ársins veitt í fyrsta sinn
Hugmyndir Jóhannesar Loftssonar, efnaverkfræðings og byggingaverkfræðings og Ingólfs Harðarsonar, flugvirkja og rafeindavirkja eru Fræ ársins 2010. Fræið er frumkvöðlasamkeppni á vegum Háskólans í Reykjavík í samstarf ivið Klak – nýsköpunarmiðstöð atvinnulífsins, Hugmyndahús háskólanna og Auði Capital. Markmið keppninnar er að styðja við frumstig nýsköpunar. Jóhannes hefur í samstarfi við bandarískan samstarfsaðila þróað örþunnan loftræstibúnað fyrir hús sem er allt að tíu sinnum þynnri en sambærilegt öflugt tæki á markaðnum. Ingólfur hefur þróað nýja tegund af undirvagni fyrir rafmagnsfarartæki sem gerir þeim kleift að keyra beint til hliðar. Upplýsingar um Fræið og verðlaunahugmyndirnar.
Árshátíð VFÍ verður 6. febrúar
Árshátíð Verkfræðingafélags Íslands verður haldin í Súlnasal Hótels Sögu laugardaginn 6. febrúar 2010. - Fordrykkur, hátíðarkvöldverður, skemmtidagskrá og hljómsveit leikur fyrir dansi. Miðapantanir á skrifstofu VFÍ í síma: 535 9300 eða með tölvupósti. Upplýsingar um matseðil og dagskrá.
þetta vefsvæði byggir á eplica.
eplica vefumsjón