Þann 1. júlí 2011 tók sameining Verkfræðingafélags Íslands og Stéttarfélags verkfræðinga formlega gildi undir heiti þess fyrrnefnda.  Markmiðið með sameiningunni er að þjóna sem best hagsmunum allra verkfræðinga. Við sameininguna voru félagsmenn um 2200 eða um 75% allra verkfræðinga á vinnumarkaði.

Verkfræðimenntun er mjög krefjandi undirbúningur fyrir ævistarf. VFÍ samþykkir menntun og réttindi verkfræðinga og stendur vörð um þau. Samkvæmt lögum hafa þeir menn einir rétt til að kalla sig verkfræðing, sem fengið hafa til þess leyfi ráðherra, enda hafi þeir lokið námi frá fullgildum verkfræðiskóla. Menntamálanefnd VFÍ er umsagnaraðili um starfsheitisumsókn. Í samvinnu við Iðnaðarráðuneytið hefur VFÍ sett fram þær menntunarkröfur sem þarf til að öðlast starfsheitið verkfræðingur.

Við styrkjum stöðu fagsins og einstaklinga innan þess með því að efla þekkingu og tryggja faglega umfjöllun. VFÍ er stofnaðili að Endurmenntun Háskóla Íslands (EHÍ) og tryggir framboð símenntunar með góðu samstarfi við EHÍ. Vaxandi samkeppni milli faghópa um forystu á sviði vísinda, stjórnunar, athafna og viðskipta undirstrikar nauðsyn þess að efla þekkingu og samstöðu verkfræðinga.