Félagsaðild
Í félagslögum VFÍ (gr. 4, 5 og 8) er að finna eftirfarandi um félagsaðild að VFÍ:
Almennir félagar
Almennir félagar geta orðið:
1. Þeir, sem lokið hafa viðurkenndri prófgráðu í verkfræði, svo og þeir, sem lokið hafa viðurkenndri háskólaprófgráðu í þeim vísindagreinum, sem verkfræðin byggist á (eðlisfræði, efnafræði, stærðfræði o.fl.).
2. Aðrir fræðimenn í raunvísindum eða framkvæmdamenn á tæknisviði, sem stjórn félagsins býður að gerast félagar, þegar ástæður mæla með.
Ungfélagar
Verkfræðinemar, sem lokið hafa tveimur námsárum af háskólanámi í verkfræði eða vísindagrein, sem verkfræðin byggist á, geta orðið félagar með takmörkuðum réttindum og skyldum skv. 9. og 10.gr. meðan þeir stunda námið. Nefnast þeir ungfélagar. Verkfræðinemar, sem óska eftir inntöku skulu senda stjórn skriflega umsókn. Stjórnin tekur endanlega afstöðu til slíkra umsókna.
Gestaaðild
Félagi í VFÍ, SV eða TFÍ, sem sækir um vinnu, eða vinnur eða er búsettur um stundarsakir í einhverju hinna norðurlandanna getur gerst gestafélagi í félagi viðkomandi lands. Sama gildir um félagsmenn þeirra félaga sem eru aðilar að NORDING þeir geta gerst gestafélagar í VFÍ, SV eða TFÍ.
Umsóknir
Þeir, sem óska að gerast félagar skv. 1. lið 4.gr., skulu senda stjórn félagsins umsóknir um inngöngu á eyðublöðum, sem stjórnin gefur út. Framkvæmdastjóri félagsins sendir Menntamálanefnd VFÍ til umsagnar allar umsóknir um inngöngu í félagið og/eða verkfræðingstitilinn. Menntamálanefnd fer eftir þeim reglum sem stjórnin hefur samþykkt um meðferð umsókna (inntökureglur), þar sem m.a. skal kveðið á um lágmarkskröfur sem gera skal til menntunar nýrra félagsmanna. Ef umsögn menntamálanefndar er jákvæð ber stjórninni að veita umsækjanda aðild að félaginu. Ef umsögn er neikvæð getur stjórnin ekki veitt viðkomandi aðild að félaginu, nema í algjörum undantekningartilvikum, t.d. ef viðkomandi getur ekki aflað tilskilinna gagna vegna styrjalda eða af stjórnmálalegum ástæðum. Í slíkum tilfellum þarf stjórnin að samþykkja inngöngu samhljóða.