Verkfræðingafélag Íslands skilaði umsögn um drög að nýrri reglugerð um Loftslags- og orkusjóð. Félagið tekur undir markmið um einföldun regluverks og skýrari aðgreiningu samkeppnisstyrkja og beinna stuðningsaðgerða.

VFÍ bendir á að sjóðurinn sé mikilvægt fjármögnunartæki fyrir tækni- og verkfræðiverkefni á sviði orkuskipta, hringrásarhagkerfis og orkunýtingar. Félagið leggur því áherslu á faglegt mat umsókna, skýrar reglur og fyrirsjáanleika fyrir umsækjendur.

Í umsögninni er meðal annars fjallað um hlutverk fagráða, styrki til lengri tíma og mikilvægi þess að frumkvöðlar og sprotafyrirtæki hafi áfram raunhæfa möguleika á stuðningi við þróun nýrrar loftslags- og orkutækni.

Helstu tillögur VFÍ

1. Fagleg sérþekking við mat umsókna. Fyrirkomulag fagráða verði skýrt og tryggt að sérþekking þeirra taki mið af eðli verkefna.
2. Styrkir til lengri tíma. Skýrt verði hvernig þriggja ára styrkveitingar samræmast því að samningar séu almennt gerðir til eins árs.
3. Fyrirsjáanleiki styrkja. Upplýsingar um styrkhlutföll og fjárhæðir liggi fyrir með nægum fyrirvara.
4. Stuðningur við nýsköpun. Tryggt verði að breytingarnar dragi ekki úr stuðningi við frumkvöðla, sprotafyrirtæki og þróun nýrra tæknilausna.
5. Lánveitingar sjóðsins. Reglugerðin kveði á um fyrirkomulag lánveitinga í samræmi við lög um sjóðinn.

Verkfræðingafélag Íslands vill taka þátt í stefnumótun, lagasetningu og ákvarðanatöku. Félagið er virkur umsagnaraðili um málefni er tengjast hagsmunum félagsmanna og samfélagsins í heild.

Á vef VFÍ eru birtar umsagnir frá árinu 2023. Eldri umsagnir má nálgast í Samráðsgátt stjórnvalda. Einnig má hafa samband við skrifstofu VFÍ.