Ákvörðun launa
Kjarasamningurinn tryggir lágmarksréttindi. Laun og önnur starfskjör eru ákvörðuð í ráðningarsamningi sem gerður er milli vinnuveitanda og starfsmanns. Fjárhæð launa, samsetning þeirra o.þ.h. er samkvæmt ákvæðum ráðningarsamnings.
Í launaviðtali geta vinnuveitandi og starfsmaður meðal annars haft til hliðsjónar launabreytingar í kjarasamningum á almennum vinnumarkaði og almenna launaþróun háskólamanna.
Á undanförnum árum meira borið á svokölluðum fastlaunasamningum á verkfræðistofunum. Við hvetjum félagsmenn að fara varlega í að gera slíka samninga og kynna sér vel hvað í þeim felst.
Greiðslur vinnuveitanda í sjóði
- Sjúkrasjóður 1% af heildarlaunum.
- Starfsendurhæfingarsjóður 0,10% af heildarlaunum. Athugið að greiðslu ber að skila til lífeyrissjóðs.
Orlofssjóður VFÍ og endurmenntun
Samkvæmt kjarasamningi við FRV er ekki greitt í orlofssjóð VFÍ. Dæmi eru um að starfsfólk verkfræðistofa greiði sjálft iðgjöld til sjóðsins.
Verkfræðistofurnar greiða ekki í Starfsmenntunarsjóð VFÍ og er kveðið á um rétt til endurmenntunar í kjarasamningnum. Félagsmaður á rétt á að verja allt að tíu vinnudögum á fullum dagvinnulaunum til endurmenntunar í samráði við vinnuveitanda. (Sjá nánar í grein 7.3. Framhaldsmenntun).
Launaviðtöl eru mikilvæg
Starfsmaður hefur samningsbundinn rétt á viðtali við yfirmann sinn einu sinni á ári um störf sín og hugsanlegar breytingar á starfskjörum. Óski starfsmaður eftir viðtali á að veita það innan tveggja mánaða og niðurstaða viðtalsins á að liggja fyrir innan mánaðar.
Í launaviðtali er ekki einungis verið að semja um laun heldur einnig um vinnuframlag og mikilvægi starfsmannsins og horft til þeirra þátta er snúa að starfsumgjörð viðkomandi.
VFÍ heldur reglulega námskeið í launaviðtölum.
Vertu með á nótunum. Kynntu þér kjarasamninginn og skoðaðu launaseðilinn.