Verkfræðingafélag Íslands tilkynnir að félagið þurfi að fresta aðalfundi, sem hafði áður verið auglýstur 28. apríl nk. kl. 17.00. Nýr fundartími er þriðjudagurinn 12. maí 2026 kl. 17.00. Fundarstaður er í Verkfræðingahúsi, Engjateigi 9.

Streymt verður frá fundinum. Þau sem vilja fá hlekk á streymi vinsamlega skrái sig hér.

Fundinum er frestað í þeim tilgangi að framkvæma með fullnægjandi hætti kosningu í aðalstjórn félagsins. Áður hafði komið fram að sjálfkjörið væri í stjórnir félagsins. Nú hefur komið í ljós að fleiri en eitt gilt framboð hafi borist í stöðu meðstjórnanda í aðalstjórn félagsins. Því þarf að kjósa á milli frambjóðenda. Sjálfkjörið er í aðrar stöður skv. fyrra fundarboði.

 Samkvæmt 11. gr. laga VFÍ fer kosning stjórnarmanna fram með bréflegum eða rafrænum hætti í aðdraganda aðalfundar. Rafrænir kjörseðlar verða sendir félagsmönnum á næstu dögum.

Lagabreytingar

Á aðalfundinum mun stjórn VFÍ leggja fram tillögu um stofnun Kjaradeilusjóðs VFÍ, ásamt tillögum að tilheyrandi lagabreytingu og reglugerð sjóðsins.

Endurvakinn sjóður SV

Stjórn Verkfræðingafélags Íslands leggur til að stofnaður verði Kjaradeilusjóður Verkfræðingafélags Íslands. Sjóðurinn verði aðeins ætlaður félögum í Kjaradeild VFÍ og aðeins þeir muni koma til með að greiða gjöld til sjóðsins, þegar þau verða innheimt. Stofnframlag sjóðsins kemur alfarið úr vinnudeilusjóði Stéttarfélags verkfræðinga (SV), sem var lagður niður við sameiningu Verkfræðingafélags Íslands og Stéttarfélags verkfræðinga. Sjóðnum hefur verið haldið aðskildum frá öðrum fjármunum félagsins til þessa dags. Tillaga stjórnar felur í sér að það verði ekki greidd gjöld í sjóðinn á árinu 2026 og 2027, heldur renni aðeins vaxtatekjur til sjóðsins. Ákvörðun um sjóðsgjöld er á forræði aðalfundar, sbr. 23. gr. laga VFÍ. Ákvörðun um sjóðsgjöld árið 2028 verði tekin á aðalfundi 2027.

Skjal með skýringum og tillögu stjórnar

Stjórnarkjör

Skila átti framboðum fyrir 15. febrúar. Rafræn kosning fer fram í aðdraganda aðalfundar. Á aðalfundinum verður tilkynnt hverjir munu sitja í stjórnum félagsins.

Upphafleg frétt um aðalfundinn birtist á vef VFÍ 5. febrúar 2026.

Einnig birtist frétt á vef VFÍ 14. apríl með fundarboði og upplýsingum um tillögu stjórnar um stofnun kjaradeilusjóðs.

Upplýsingar sendar félagsmönnum 5. febrúar:

Samkvæmt félagslögum á að skila framboðum í stjórnir félagsins og tillögum sem leggja á fyrir aðalfund fyrir 15. febrúar.

Kosið verður í aðalstjórn VFÍ, stjórn Kjaradeildar VFÍ og stjórn Deildar stjórnenda og sjálfstætt starfandi í VFÍ. Félagsmenn eru hvattir til að gefa kost á sér í gefandi og skemmtileg störf fyrir félagið. Senda á framboð og tillögur til framkvæmdastjóra félagsins Árna B. Björnssonar.

Nánar um stjórnarkjör

Kosning til aðalstjórnar.
Úr stjórn eiga að ganga: Erlendur Örn Fjeldsted meðstjórnandi og Silvá Kjærnested, varameðstjórnandi.
Því er kosið um meðstjórnanda og varameðstjórnanda til tveggja ára.

Kosning til stjórnar Kjaradeildar.
Úr stjórn Kjaradeildar eiga að ganga Ásdís Sigurðardóttir meðstjórnandi og Kristjána Ósk Birgisdóttir, varameðstjórnandi.  Því er kosið um meðstjórnanda og varameðstjórnanda til tveggja ára.

Kosning í stjórn Deildar stjórnenda og sjálfstætt starfandi (SVFÍ).
Úr stjórn SVFÍ á að ganga Jón Guðmundsson varameðstjórnandi. Því er kosið um varameðstjórnanda til eins árs.