Ný umsögn: Áform um atvinnustefnu til 2035
Áhersla á menntun og tæknigreinar.
Verkfræðingafélag Íslands (VFÍ) hefur skilað inn umsögn um áform ríkisstjórnarinnar um atvinnustefnu Íslands til 2035 (mál nr. S-144/2025).
VFÍ fagnar tækifærinu til að leggja fram tillögur og bendir á að ein mikilvægasta undirstaða samkeppnishæfs og sjálfbærs atvinnulífs sé öflugur mannauður í verkfræði og öðrum tæknigreinum.
Helstu áherslur félagsins eru:
-
Menntun sem grunnur verðmætasköpunar: Háskólamenntun, sérstaklega í tæknigreinum, er forsenda nýsköpunar og framleiðni.
-
Raungreinar og tæknilæsi: Efla þarf stærðfræði, raungreinar og upplýsingatækni á öllum skólastigum og byggja upp tæknilæsi sem almenna hæfni í samfélaginu.
-
Háskólar og atvinnulíf: Auka opinberan stuðning við háskólanám í tæknigreinum og efla tengsl háskóla og atvinnulífs.
-
Virðing fyrir menntun: Laun og starfsþróun þurfa að endurspegla gildi háskólamenntunar í tækni- og raunvísindum.
-
Atvinnusköpun: Byggja á störfum í þekkingariðnaði, grænum lausnum og nýsköpun fremur en láglaunastörfum sem skapa álag á innviði.
-
Langtímasýn: Ísland þarf skýra stefnu um atvinnulíf framtíðarinnar sem byggir á rannsóknum, tækni og sjálfbærni.
-
Útflutningsgreinar framtíðarinnar: Orkutækni og grænar lausnir, hugbúnaðar- og upplýsingatækni, líftækni, matvæla- og heilbrigðistækni, auk rannsókna og verkfræðiráðgjafar.
VFÍ telur að með markvissri stefnumótun í mennta- og atvinnumálum sé hægt að tryggja að Ísland verði samkeppnishæft á alþjóðavísu og eftirsóknarvert samfélag fyrir vel menntað fólk.
Umsögnin
Verkfræðingafélag Íslands vill taka þátt í stefnumótun, lagasetningu og ákvarðanatöku. Félagið er virkur umsagnaraðili um málefni er tengjast hagsmunum félagsmanna og samfélagsins í heild.