Norrænu félögin standa saman
Tillögur ANE - Tíu skref til að takast á við áskoranir vegna COVID-19.
ANE (Association of Nordic Engineers) eru samtök félaga verkfræðinga og tæknifræðinga á Norðurlöndunum. Samtals eru félagsmenn um 500 þúsund. ANE sendi nýverið norrænu viðskiptaráðherrunum tillögur í tíu skrefum til að takast á við áskoranir tengdar COVID-19. Tillögurnar eru í nafni allra félaganna og undirritaðar af formönnum þeirra. Tillögur ANE til norrænu ráðherranna.
Svana Helen Björnsdóttir, formaður Verkfræðingafélags Íslands, segir afar mikilvægt að Norðurlöndin standi saman sem ein heild í því verkefni að takast á við afleiðingar COVID-19. „Nýsköpun, hugvit og tækni eru lykilorðin í að vinna okkur út úr vandanum og þar gegna verkfræðingar og tæknifræðingar mikilvægu hlutverki. COVID-19 mun hafa varanlegar breytingar í för með sér fyrir fólk og fyrirtæki og tæknimenntun og -þekking er lykillinn að þeirri nýsköpun sem nú er kallað eftir." Hún bætir því við að frumkvæði Þórdísar Kolbrúnar Reykfjörð Gylfadóttur, ferðamála- iðnaðar- og nýsköpunarráðherra, um þver-norræna nálgun í viðbrögðum við COVID-19 hafi strax hlotið hljómgrunn innan ANE og í framhaldi af því hafi tillögurnar verið mótaðar.
Norrænu ráðherrarnir samþykktu um miðjan aprílmánuð að stofna „þver-norrænan hóp sem, með aðstoð norrænu ráðherranefndarinnar, leggur áherslu á að vera hraðall og mun gera útlínur að norrænum vegvísi fyrir nánara samstarf á sviðum þar sem ríkin geta unnið saman með það að markmiði að endurræsa hagkerfi sín eftir COVID-19." Eins og segir í frétt á vef Stjórnarráðsins.
Norðurlöndin í forystuhlutverki
ANE leggur áherslu á að í þver-norrænu samstarfi eigi áherslan að vera á græn orkuskipti, fjárfestingar í nýsköpun og sjálfbærni. Þá marki samtakamáttur og sameiginleg gildi svæðinu sérstöðu í þeim viðfangsefnum sem framundan eru.
Í tillögum ANE eru nefnd tíu skref sem Norðurlöndin geti stigið í sameiningu til að takast á við hagrænar og samfélagslegar áskorarnir vegna COVID-19.
- Sameiginleg sýn fyrir græn orkuskipti.
- Norrænt hringrásarhagkerfi.
- Kolefnisjöfnun samgangna.
- Aukin skilvirkni og hagkvæmni á raforkumarkaði.
- Minni notkun jarðefnaeldsneytis í iðnaði.
- Rrannsóknir á nýrri tækni.
- Rannsóknir á sviði gervigreindar.
- Áhersla á hæfniþróun og endurmenntun.
- Gagnaöryggi og persónuvernd.
- Stafrænt sjálfræði.
Í tillögum ANE er einnig bent á mikilvægi þess að Norðurlöndin í heild verði efnahagslega sjálfstætt svæði með opin landamæri án viðskiptahindrana þar sem áhersla er á traust tengsl við Evrópusambandið og önnur lönd Evrópu.
- Næsta færsla
- Fyrri færsla