Fréttir

Rafræn atkvæðagreiðsla um tillögu að sameiningu Verkfræðingafélags Íslands og Tæknifræðingafélags Íslands er hafin og henni lýkur kl. 17 næstkomandi föstudag, 11. nóvember. Félagsvísindastofnun HÍ sér um framkvæmd atkvæðagreiðslunnar og voru kjörseðlar sendir félagsmönnum í tölvupósti laugardaginn 5. nóvember.

Félagsmenn eru hvattir til að taka þátt í atkvæðagreiðslunni, það er einfalt mál. Félagslega mikilvægt er fyrir VFÍ að sem flestir greiði atkvæði og taki afstöðu.

Stjórnir Kjaradeildar Verkfræðingafélags Íslands og Kjarafélags Tæknifræðingafélags Íslands hafa sent frá sér ályktun þar sem nýkjörið Alþingi er hvatt til þess að endurskoða úrskurð kjararáðs um launa­kjör æðstu emb­ætt­is­manna þjóðar­inn­ar.

Rafræn atkvæðagreiðsla um sameiningu VFÍ og TFÍ fer fram dagana 5. - 11. nóvember. 

Kynningarfundur fyrir félagsmenn VFÍ vegna fyrirhugaðrar atkvæðagreiðslu um sameiningu VFÍ og TFÍ var haldinn 27. október. Gagnleg umræða fór fram og spurningum svarað. Skrifstofan heldur utan um þær spurningar sem hafa borist frá félagsmönnum. Spurningar og svör vegna atkvæðagreiðslu.

Stjórnir VFÍ og TFÍ hafa samþykkt að láta fara fram allsherjaratkvæðagreiðslu um sameiningu félaganna. Atkvæðagreiðslan verður 5. - 11. nóvember. Fram að þeim tíma verða hugmyndir um sameiningu kynntar, m.a. á heimasíðum félaganna og á opnum kynningarfundum 26. og 27. október. Félagsmenn eru eindregið hvattir til að kynna sér vel þau gögn sem liggja fyrir. Ef spurningar vakna er hægt að senda tölvupóst eða leggja fram fyrirspurnir á Facebook síðu VFÍ.

Samstarfsnefnd VFÍ – Verkfræðingafélags Íslands og TFÍ – Tæknifræðingafélags Íslands hefur lokið störfum.  Nefndin hefur lagt fyrir stjórnir félaganna tillögur að samrunasamningi og nýjum lögum fyrir sameinað félag tæknifræðinga og verkfræðinga.

Sjúkra- og styrktarsjóðir VFÍ hafa gert samning við Rannsóknarstöð Hjartaverndar um að bjóða sjóðfélögum áhættumat, fræðslu og forvarnaraðgerðir gegn hjartasjúkdómum. Næstkomandi fimmtudag, 29. september kl. 12-13, er sjóðfélögum boðið til kynningarfundar vegna átaksins. Fundurinn verður í Verkfræðingahúsi, Engjateigi 9.
Á fundinum mun Karl Andersen hjartasérfræðingur hjá Hjartavernd kynna átakið og svara spurningum. Áhættumat Hjartarannsóknar.

Það var vel mætt á Samlokufundinn í hádeginu í dag þar sem Birkir Rútsson, verkfræðingur, sagði frá reynslu sinni af því að búa og starfa á Grænlandi. Hann starfar hjá dönsku verkfræðistofunni Orbicon sem mun opna útibú hér á landi næsta vor og mun Birkir flytja til Íslands af því tilefni. Glærur frá fyrirlestrinum.

Dagana 7. - 9. september var haldinn norrænn launafundur verkfræðinga og tæknifræðinga, svokallaður NIL fundur sem haldinn er árlega. VFÍ og TFÍ voru gestgjafar að þessu sinni. Þema fundarins var „vinnumarkaður framtíðarinnar". Fjallað var sérstaklega um framleiðni, sveigjanleika og samkeppnishæfni.

Nú er hægt að sækja um dvöl í orlofshúsum VFÍ í vetrarfrísvikum grunnskólanna sem eru að þessu sinni tvær. Frá 20. – 27. október og 27. október – 3. nóvember 2016.
Frestur til að sækja um orlofsviku er til miðnættis 26. september. Úthlutun fer fram daginn eftir. Frádráttur er 30 punktar fyrir orlofsvikuna.

Sótt er um á orlofsvef félags með því að velja aðra hvora vikuna. Þá kemur upp umsókn þar sem valin er staðsetning og vikan sem óskað er eftir. (Aðeins er hægt að velja einn stað). Athugið að þegar umsókn hefur verið samþykkt, fær félagsmaður staðfestingu senda í stölvupósti. Úthlutað er eftir punktastöðu. 

Það stefnir í metfjölda umsókna um félagsaðild að VFÍ þetta árið. Á síðasta stjórnarfundi VFÍ fengu 33 nýir félagsmenn inngöngu í félagið, þar af sex ungfélagar. Á árinu 2015 voru 237 umsóknir samþykktar og að auki gengu 45 ungfélagar til liðs við félagið. Heildarfjöldi umsókna var þá mun meiri en árið á undan og hafa aldrei verið fleiri. - En það stefnir semsagt í að það met verði slegið. (Mynd: Háskólinn í Reykjavík).

Frá og með föstudeginum 12. ágúst kl. 15 verður hægt að bóka orlofsvikur frá 2. september 2016 til 18. maí 2017 á orlofsvef OVFÍ.

Um vetrarleigu gildir reglan fyrstur kemur, fyrstur fær. Eins og áður verður orlofsvikum í vetrar- og páskafríum úthlutað sérstaklega.

Niðurstöður kjarakönnunar Kjaradeildar VFÍ liggja fyrir. Könnunin er einfaldari en áður og var spurt um laun í febrúar 2016. Með því að skoða laun eftir starfsaldri, lífaldri, fagsviði og starfssviði má nálgast þau markaðslaun sem við eiga fyrir hvern einstakling.  

Samið hefur verið við Samninganefnd sveitarfélaga fyrir hönd verkfræðinga, tæknifræðinga og byggingafræðinga. Um er að ræða framlengingu og breytingar á kjarasamningum 2015-2019. Samningurinn var samþykktur með yfirgnæfandi meirihluta í rafrænni atkvæðagreiðslu.

Tækni- og verkfræðideild Háskólans í Reykjavík heldur Tæknidaginn í tíunda sinn föstudaginn 13. maí. Tæknidagurinn er haldin árlega og er gestum og gangandi boðið að kynna sér afrakstur verklegra og hagnýtra námskeiða og það öfluga starf sem unnið er í Tækni- og verkfræðideild HR.

Félagsmenn TFÍ og VFÍ eru sérstaklega boðnir velkomnir.

Dagskrá Tæknidagsins 2016.

Orlofsúthlutun OVFÍ  sumar 2016 er lokið. Þeir sem fengu úthlutun í fyrstu umferð höfðu greiðslufrest til miðnættis 5. maí. Frá hádegi 6. maí gátu þeir sem fengu synjun sótt um þær vikur sem ekki gengu út. Gilti þá reglan fyrstur bókar, fyrstur fær. Þann 10. maí var opnað fyrir allar lausar vikur og gildir sama regla; - Fyrstur bókar, fyrstur fær og verður að greiða um leið og bókað er.

Hver sjóðfélagi getur keypt allt að 10 gistimiða á almanaksári, þ.e.a.s ef hann hefur ekki fengið orlofshús  - Athugið að hótelmiðar fást ekki endurgreiddir. Bókunarvefur OVFÍ.

Nýverið var Júlíus Sólnes gerður að heiðursfélaga Verkfræðingafélags Íslands, sem er æðsta viðurkenning félagsins. Við sama tækifæri voru þrír einstaklingar sæmdir heiðursmerki félagsins. Þau eru Guðni A. Jóhannesson, Helgi Þór Ingason og Sigrún Pálsdóttir.

Orlofssjóður VFÍ hefur tekið í notkun nýjan bókunarvef fyrir orlofshúsin „Frímann" og verður hann notaður í fyrsta sinn við sumarúthlutun 2016. - Tímabilið 3. júní 2016 til 2. september 2016. Umsóknarfrestur rennur út á miðnætti 26. apríl. Nánari upplýsingar voru sendar sjóðfélögum með tölvupósti.

Athugið að punktastaða verður ekki birt fyrr en greiðslusíða opnar 21. apríl.

Nánari upplýsingar.

Aðalfundur VFÍ var haldinn 8. apríl 2016.  Páll Gíslason  er nýr formaður félagsins. Nýr formaður Kjaradeildar VFÍ er Birkir Hrafn Jóakimsson og  Sveinn I. Ólafsson var endurkjörinn formaður Deildar stjórnenda og sjálfstætt starfandi. Afkoma VFÍ á árinu var góð og met var slegið í fjölda umsókna um inngöngu í félagið, voru 107 fleiri en á fyrra ári.

Ársskýrsla VFÍ 2015-2016.

Aðalfundur Verkfræðingafélags Íslands verður haldinn 8. apríl kl. 16. Sjálfkjörið er í stjórnir félagsins en tillögur fyrir aðalfund og framboð til stjórnar áttu að berast fyrir 15. febrúar.

Stjórn leggur til breytingu á lögum félagsins. Hún varðar aðild ungfélaga á þann hátt að ekki verði skilyrði að þeir hafi lokið einu ári í námi heldur að þeir stundi nám. Þar með geta nemendur á fyrsta ári orðið ungfélagar.

Dagur verkfræðinnar verður haldinn í annað sinn föstudaginn 1. apríl kl. 13 á Hótel Reykjavík Natura (Hótel Loftleiðir). Fyrir liggur fjölbreytt og spennandi dagskrá þar sem fyrirlestrar og kynningar fara fram í þremur opnum sölum. Markmiðið með Degi verkfræðinnar er að kynna verkfræðina, störf verkfræðinga og ekki síst efla tengsl og samheldni meðal íslenskra verkfræðinga.

Dagur verkfræðinnar var fyrst haldinn í apríl 2015 og þótti takast einstaklega vel.

Ókeypis aðgangur og allir velkomnir.

Skráning á Dag verkfræðinnar.

Kynningarfundur um nýjan kjarasamning við FRV verður haldinn mánudaginn 21. mars kl. 17:20 í Verkfræðingahúsi, Engjateigi 9. 

Gagnvart Samtökum atvinnulífsins er rétt að líta á lágmarkshækkanir skv. SA-ASÍ kjarasamningi sem eru 6,2% frá 1. janúar 2016 og hann gildir til 2019 með viðbótarhækkunum 2017 og 2018. Jafnframt var samið um hækkanir á framlagi í lífeyrissjóð. Samningurinn hefur áhrif á heildarhreyfingu launa á almenna markaðanum og þar af leiðandi á markaðslaun verkfræðinga. 

Páskaúthlutun Orlofssjóðs VFÍ er lokið. Allir umsækjendur eiga að hafa fengið svör í tölvupósti. Umsóknarfrestur var til 15. febrúar.

Í tilefni af aldarafmæli Dansk-íslenska félagsins á Íslandi verður málþing í Hátíðarsal Háskóla Íslands fimmtudaginn 4. febrúar. Yfirskriftin er: Nám og störf Íslenskra verkfræðinga í Danmörku. Allir velkomnir. Dagskráin.

Föstudaginn 29. janúar mun Byggingarverkfræðingadeild VFÍ (BVFÍ) standa fyrir heimsókn á Keflavíkurflugvöll í boði ISAVIA. Allir félagsmenn VFÍ velkomnir en sætaframboð er takmarkað. Skráning er í ferðina og henni lýkur kl. 12 fimmtudaginn 28. janúar.

Kvennanefnd Verkfræðingafélags Íslands heldur hið árlega Rósaboð fimmtudaginn 28. janúar næstkomandi kl. 17-19 í sal Verkfræðingafélags Íslands, Engjateigi 9. Konum sem útskrifuðust með próf í verkfræði á árinu 2015 verður afhent rós og með þeim táknræna hætti boðnar velkomnar í hópinn. Skráning.

Nú er hægt að sækja um orlofshús OVFÍ í vetrarfrísvikunum í febrúar. Til að sækja um á að senda tölvupóst til skrifstofunnar. þar sem tekin er fram ósk um staðsetningu og viku eða tímabil. Einnig þarf að fylgja með fullt nafn og kennitala.

Úthlutað verður 19. janúar 2016. Upplýsingar um orlofshúsin.