Samstarf norræna félaga verkfræðinga og tæknifræðinga.

Verkfræðingafélag Íslands er aðili að ANE (Association of Nordic Engineers).
Samstarf við félög verkfræðinga og tæknifræðinga á hinum Norðurlöndunum er mikilvægur þáttur í starfsemi Verkfræðingafélagsins. Tengsl við systurfélögin eru afar mikilvæg bæði hvað varðar faglega og kjaralega hagsmuni.

ANE - Association of Nordic Engineers

Verkfræðingafélag Íslands varð aðili að ANE í upphafi árs 2018. ANE er samstarfsvettvangur félaga verkfræðinga og tæknifræðinga í Danmörku, Svíþjóð, Finnlandi og öðru af tveimur félögum í Noregi. Hlutverk ANE er að gæta hagsmuna norrænna verkfræðinga og tæknifræðinga bæði innan Norðurlandanna og í alþjóðlegu tilliti. Í dag eru um 500 þúsund félagsmenn í aðildarfélögum ANE.

ANE hefur unnið að ýmsum verkefnum má meðal annars nefna könnun á hæfniþróun og aðgerðaáætlun um siðferði og gervigreind. Verkefni ANE af þessu tagi eru unnin sameiginlega af starfsmönnum norrænu félaganna. Báðar þessar skýrslur má nálgast á vef VFÍ.

Á vef ANE, www.nordicengineers.org eru greinargóðar upplýsingar um starfsemina.

Nording

Nording var ekki með formlega starfsemi heldur umræðuvettvangur forsvarsmanna norrænna félaga verkfræðinga og tæknifræðinga. Einnig hafði félagið í Eistlandi fulla aðild að Nording. Haustið 2025 var ákveðið að leggja Nording niður. VFÍ talaði fyrir því á vettvangi ANE og NORDING  sameina kraftana undir merkjum ANE, það er nú orðið að veruleika.

Samvinna á sviði kjaramála

Kjaramál eru fastur liður á dagskrá ANE. Einnig er einu sinni á ári haldinn norrænn launafundur, NIL (Nordisk Ingeniör lönmöde). Það er vettvangur til að fara yfir launaþróun og miðla upplýsingum er varða kjaralega hagsmuni stéttarinnar.