Niðurstöður kjarakönnunar 2020
Nýtt rafrænt viðmót í vinnslu.
Niðurstöður kjarakönnunar Kjaradeildar VFÍ liggja fyrir. Spurt var um laun í febrúar 2020. Með því að skoða laun eftir starfsaldri, lífaldri, fagsviði og starfssviði má nálgast þau markaðslaun sem við eiga fyrir hvern einstakling. Nýtt rafrænt viðmót á að auðvelda félagsmönnum að greina stöðu sína og gera samanburð á mismunandi hópum.
Kjarakönnun Kjaradeildar VFÍ 2020 - Verkfræðingar. (Pdf).
Kjarakönnun Kjaradeildar VFÍ 2020 - Tæknifræðingar. (Pdf).
Leiðréttur kynbundinn launamunur
Sérstök greining var gerð á leiðréttum kynbundnum launamun meðal verkfræðinga eins og sjá má á bls. 30 í könnuninni. Þegar búið er að stýra fyrir áhrifum aldurs, starfsaldurs, menntunar, stjórnunarstöðu, starfsvettvangs og starfssvæðis voru karlar að jafnaði með 1,2% hærri grunnlaun en konur, en sá munur var hins vegar ekki tölfræðilega marktækur. Þessar niðurstöður gefa til kynna að karlar séu með á bilinu 2,1% lægri laun en konur upp að 4,6% hærri laun, að teknu tilliti til fyrrgreindra þátta. Því er ekki hægt að greina að um kynbundinn launamun sé að ræða meðal verkfræðinga í fullu starfi.
Rétt er að taka fram að þar sem hlutfallslega fáar konur eru í hópi tæknifræðinga þá var ekki unnt að gera greiningu á leiðréttum kynbundnum launamun.
Launaviðtöl
Enn og aftur kemur í ljós að launviðtöl borga sig. Athygli vekur að einungis 37,8% verkfræðinga og 25,1% tæknifræðinga fóru í launaviðtal á árinu 2019. Er það lægra hlutfall en á fyrra ári. Yfirgnæfandi meirihluti þeirra sem fóru í viðtal fengu launahækkun í kjölfarið. (Verkfræðingar 72,8% og tæknifræðingar 66,3%).
Námskeið í launaviðtölum hefur verið vel sótt. Næsta námskeið verður haldið í haust. Það verður auglýst á vef VFÍ, á Facebook og með tölvupósti til félagsmanna. Einnig verður boðið upp á fleiri námskeið sem varða vinnumarkað og starfsumhverfi.
Fyrirspurnir með tölvupósti: kjaramal@verktaekni.is
- Næsta færsla
- Fyrri færsla