Niðurstöður kjarakönnunar 2019
Launaviðtöl borga sig.
Niðurstöður kjarakönnunar Kjaradeildar VFÍ liggja fyrir. Spurt var um laun í febrúar 2019. Með því að skoða laun eftir starfsaldri, lífaldri, fagsviði og starfssviði má nálgast þau markaðslaun sem við eiga fyrir hvern einstakling.
Leiðréttur kynbundinn launamunur
Sérstök greining var gerð á leiðréttum kynbundnum launamun meðal verkfræðinga eins og sjá má á bls. 30 í könnuninni. Þegar búið er að stýra fyrir áhrifum aldurs, starfsaldurs, menntunar, stjórnunarstöðu, starfsvettvangs og starfssvæðis voru karlar að jafnaði með 2,5% hærri grunnlaun en konur, en sá munur var hins vegar ekki tölfræðilega marktækur. Þessar niðurstöður gefa til kynna að ekki er hægt að staðhæfa hvort það sé munur á launum verkfræðimenntaðra í fullu starfi með samsvarandi aldur, starfsaldur, menntun, stöðu, starfsvettvang og starfssvæði.
Rétt er að taka fram að þar sem hlutfallslega fáar konur eru í hópi tæknifræðinga þá var ekki unnt að gera greiningu á leiðréttum kynbundnum launamun.
Launaviðtöl
Enn og aftur kemur í ljós að launviðtöl borga sig. Athygli vekur að 39,3% verkfræðinga og tæp 30,8% tæknifræðinga fóru í launaviðtal á árinu 2018. Er það svipað hlutfall og á fyrra ári. Yfirgnæfandi meirihluti þeirra sem fóru í viðtal fengu launahækkun í kjölfarið. (Verkfræðingar 84,7% og tæknifræðingar 77,4%).
Námskeið í launaviðtölum hefur verið vel sótt. Næsta námskeið verður haldið í haust. Það verður auglýst á vef VFÍ, á Facebook og með tölvupósti til félagsmanna.
Kjarakönnun Kjaradeildar VFÍ 2019 - Verkfræðingar.
Kjarakönnun Kjaradeildar VFÍ 2019 - Tæknifræðingar.
- Næsta færsla
- Fyrri færsla